他經歷了狂妄一生,傷害了很多人,最後更傷的,當然是自己。 一家幾口引發共業,令他耿耿於懷,永遠放不下。 靈風再起時,正是轉生之時,他跟妻子靈魂相約好,要換個身份角色,來生不當情侶,當母子,血脈相連。 「懷胎十月時,我會成為你身體的一部分,以最親密的方法和你重遇。 希望你從臍帶中供給我養份和愛,使我感受愛,試著重新學懂愛。 我出生後,於成長期間,會受業力驅使,與你發生似曾相識的爭拗與仇恨,藉以繼續學習我們之間未完的課題。」 這就是「宿命」。 嗔恚,總起於無明;人生在世,也許真的有無緣無故的恨。 但相信,一句「對不起」的威力,足以粉碎因果業力程式,逾越空間、世代、物種,和角色。 最終,或能了悟十二姻緣,遂把宿命提前扭轉‭ ‬。 「這刻,棲身你子宮內,在命運大門的門縫中窺看著日換星移,其實我心裡害怕,怕要跟你再分開。 我們還有無數的前路要走,但這刻我就只求一生一世,跟你短促的廝守。 媽媽,請原諒我。我們之間的前仇往恨,或許多如恆河沙數。 就讓我們掬起雙手,形同沙漏,把所有東西都篩走,唯有愛和寬恕,永遠篩不走,流落在茫茫宇宙,恆存萬有於永久。」

《砂之器》

重生系列第二生,此生課題:「宿命和原諒」

diuhak0.jpg

《砂之器》編曲解構  By Carl Wong (IG@wongsheungchuncarl)  link

 

完成《狂人日記》之後,其實已經有咗第三部曲嘅Demo,又由於我自己嘅執著,定下咗今年三部都要首尾呼應(係,完全冇問過小克 @diuhak 同阿Jer @jeremylaous 😅)喺諸多限制下,全世界只有自己肯同自己玩呢個遊戲啦⋯⋯

第二部曲我覺得係要一首「浪漫」嘅歌去中和第一部曲嘅狂,而又可帶落第三部曲嘅XXX,而母子之間嘅愛係一早(二月底)大家已經共識咗嘅題目;花咗大概兩個月嘅時間去寫,都唔知寫咗幾多個版本🤯⋯⋯終於喺五月頭寫好,不過正值Mirror開show,所以冇通知阿Jer(因為佢實分心😏)我尾場喺後台只係問佢「你聽日有咩做?」,然後5月12號就send畀大家聽。

第一句「風 起 了」,如小克所講係緊接上一部曲最尾嘅「狂~~」,不過其實重有一個細節令我用呢三個音 - 3 2 1 (me re do),因為「狂」係 6 1 2 (la do re)所以加埋就係類似一個迴環 (嗱-到-喂-Me-喂-到)純屬自己個人貪靚⋯🤓當然陸續有嚟,成首歌最尾嗰三粒音「愛 永 久」係倒返轉嗰三個音,用上 1 2 3 (do re me)重未止,中間又嚟 -「重投入」1 2 3 對 「這萬年」 3 2 1。

編曲方面,主要都係想營造BB喺子宮內羊水中嘅環境,所以有啲朋友問有個好似「上鍊」嘅聲喺第二段verse度出現係想表達乜嘢?我嘅設計係好似一啲養份由媽媽經過臍帶輸送到BB體內同埋好似係母子之間嘅一啲用嚟溝通嘅密碼。

有追開「物語系列」嘅朋友應該會發現一開始已經有《風靈物語》嘅風同風鈴聲,再到副歌部分就有《狂人日記》嘅synth pad同《迴光物語》嘅synth lead。唱到「因果的樞紐」有一吓水滴聲,亦都係子宮內嘅聲音。隨後用鋼琴簡單地彈出一段搖籃曲來作一個比較溫馨嘅氣氛,然後又由major key轉入minor key的2nd verse。

進入第二次副歌時,鼓及弦樂加入推進預備進入bridge嘅高潮,呢段其實我係引用返《風靈》嗰段bridge嘅format去寫,想再一次帶出「輪迴」嘅感覺,我第一次睇到呢一段歌詞係好感動,而且立刻visualise到個music break要做乜!

一個媽媽輕輕撫摸著肚皮,柔柔地哼著搖籃曲,安慰著肚裡嘅BB⋯⋯呢一個係我見過最美麗嘅畫面 (多謝太太😘);而BB喺溫暖嘅羊水中隱約聽見媽媽歌聲嘅迴音、殘響,跟住好安樂地預備出生。「漆黑中 只有愛可衝破 漏光的缺口」

最後嘅一次副歌首先breakdown,係經歷瘋狂陣痛(music break)後,BB終於出世,整個世界就喺嗰一刻凝住了⋯

再到「成長自立後⋯」呢個位,我偷偷彈咗Twinkle Twinkle little star入去,點知好多人都聽到😅 好嘢!👍🏻

與此同時跟《狂》一樣,我都加入orchestra嘅元素入去,woodwinds喺呢個時候就同strings一齊合奏將個氣氛再推高啲(呢段歌詞真係唔能夠辜負)!最後所有樂器停止,只剩低幽幽的鋼琴帶出最後兩句歌詞:「歡笑 可篩走 寛恕 篩不走 説聲對不起 讓愛 永久」

Outro我特登留著弦樂樂手們嘅呼吸聲,我自己覺得係音樂嘅一部分,唔需要Over polish。

另外有一樣想分享係,阿Jer唱嘅所有harmony都係本身曲嘅一部分,有別於一般只是「和音」嘅處理方法。每一個聲部就代表不同嘅轉世,所以特意寫得音域比較高,營造比較女性化嘅感覺。

大概就係咁,希望冇乜漏。😎


P.S. 有一個人一定要多謝,以上講嘅嘢係要靠佢 @frankiehung_fkh 最後嘅混音先可以做到個層次!BTW阿Jer一路以嚟嘅所有歌都係佢Mix嘅👏🏻

《砂之器》樂手介紹 By Carl Wong (IG@wongsheungchuncarl)  link

 

由於呢首歌係圍繞媽媽同子女嘅關係,我特意請來全女班嘅樂手參與演出,首先要介紹呢位我喺「擊戰」認識嘅新朋友 @karenhlw KAREN HUI aka XO


年紀輕輕但完全掌握穩定嘅節奏,雖然外型弱質纖纖,但係力度十足,由決賽當日我已經希望可以合作!


今次用上一套做得佢阿爺嘅六十年代古董Ludwig鼓,聲音溫柔潤厚(母親)再加上佢帶嚟音色比較有勁(兒子)嘅現代Ludwig Snare(我哋冇夾過㗎),出奇地融為一體!所有東西都好似一早已註定。


香港職業女鼓手真係唔多,希望以後可以繼續合作。🤘🏻

diuHak2.jpg
carl-Choro1.jpg

《砂之器》樂手介紹 By Carl Wong (IG@wongsheungchuncarl)  link

 

今次編曲內其中一個定生死嘅元素 — 「弦樂」


由香港其中四位我極欣賞嘅樂手參與錄音。
1st Violin - Miss Leslie Ryang @rezree131
2nd Violin - Miss Katrina Rafferty @ratfurry
Viola - Miss Zhang Shuying @antonioslights
Cello - Miss Anna Kwan @kwanna99

 

坦白講我冇正統嘅音樂訓練,每次要編寫弦樂都要花上大量時間⋯⋯都未必寫得好🤣 (因為我只憑感覺加幼稚園級嘅樂理)所以一到正式錄音就非常緊張,都怕樂手們眉頭大皺!幸運地呢次錄音暢順到不得之了,基本上我只係對佢哋brief咗一句 “more expressive”,跟住四位樂手們就用佢哋嘅樂器講返個故事出嚟!😍 👈🏻呢個係我當時嘅反應!多謝呢四位用靈魂來演繹這首歌。

《砂之器》樂手介紹 By Carl Wong (IG@wongsheungchuncarl)  link

我一路有一個畫面好想喺首歌出現,就係一個正在懷孕嘅媽媽輕輕撫摸著肚皮,跟肚裡嘅BB哼住搖籃曲,安撫著他⋯⋯ 所以我想搵一副溫柔又充滿「愛」嘅聲音,但係一路都冇頭緖。就係咁啱喺混音前兩三日,我因緣際會下和啤老師 @beilosi (馮夏賢老師)有些對話,突然間我覺得「係啦!係佢啦!!」所以就大膽邀請而且重要係「急」!老師二話不說便應承兼夜晚一上完堂就趕過來⋯⋯還只能在途中先有機會聽聽首歌。果然一開口已經「啱」喇!但係貪心嘅我梗係想再要求多啲、深入啲(下刪一百個抽象形容詞),唔好忘記佢亦都係一位資深嘅演員,佢立刻將我擺喺studio入面嘅一隻Teddy bear抱入懷中,如襁褓中嘅嬰兒,即刻入戲!完全就係我腦海中嘅畫面!技驚四座、歎為觀止🤱🏻

P.S. 多謝小克 @diuhak 提醒,原來我冇提及啤老師喺邊部份出現😅,就喺「漏光的缺口~」之後哼著搖籃曲嘅女聲

bebe.jpg
jer2.jpg

歌手介紹 By Carl Wong (IG@wongsheungchuncarl)  link

難度不比「狂人日記」低,一次又一次挑戰呢個人😈

一共四個聲部全部佢自己一個人包辦,前後總共花了四日完成人聲部份。盡興!

一首浪漫又沉重嘅作品。

jer1.jpg
jer3.jpg